"Қылмыскерлерді іздестіреді": Алматы полициясы күшейтілген жұмыс режиміне ауысты
Алматы полициясы "Құқықтық тәртіп" жедел алдын алу іс-шарасы аясында қоғамдық тәртіпті қорғауды күшейтті. 10-20 мамыр аралығында Алматы полициясы күшейтілген түрде қызмет етеді. Бұл туралы Stan.kz ақпарат агенттігі хабарлайды.
Фото: Алматы полиция департаментінің баспасөз қызметі
Жедел алдын алу іс-шарасын өткізуге ұлттық ұланның әскерилер, полицейлермен және бөлімше қызметкерлері жұмылдырылған.
“Қоғамдық тәртіпті сақтау, көшелерде және басқа да қоғамдық орындарда құқық бұзушылықтың алдын алу және жолын кесу мақсатында іс-шара аясында полиция жасақтарының тығыздығы арттырылды. “Қылмысқа мүлдем төзбеушілік” қағидаты аясында полиция қызметкерлері мен әскери қызметкерлер көшелерді, аулаларды, алаңдарды, саяжайларды және басқа да қоғамдық орындарды аралайды”, – деп мәлімдеді полиция.
Полиция көші-қон заңнамасын, соның ішінде құрылыс және сауда салаларында құқық бұзушылықтарды анықтау мақсатында тексерулер жүргізіп жатыр.
“Азаматтық қару иелері мен полицияның профилактикалық есебінде тұрған адамдарды тексеру жүргізіліп жатыр. Хабар-ошарсыз кеткен адамдарды, қылмыскерлерді іздестіру, сонымен қатар бөтеннің мүлкін ұрлаумен, пәтер тонаумен, ұрлықпен және т.б. айналысатын қылмыстық топтарды әшкерелеу бойынша ПД-ның жедел бөлімшелерінің жұмысы күшейтілді”, – делінген полиция хабарламасында.
Еске салайық, бұған дейін Қазақстан полициясы мереке күндері күшейтілген режимге көшкені туралы жазған едік. Ішкі істер министрлігі мәлім еткендей, мереке күндері – 6-9 мамырда полиция қызметкерлері құқық тәртібі мен қоғамдық қауіпсіздікті қамтамасыз ету мақсатында күшейтілген жұмыс режиміне ауысты.